Во пресрет на квалификациониот турнир во Порто, тренерот на Металург, Лино Червар, за Нова Македонија го изјави следното:

- Металург, а и воопшто еден македонски претставник првпат ќе бара пат до ЛШ на гостински терен. Затоа, објективно, мала предност треба да му се даде на Порто. На нас, Динамо Минск и Запорожје, ни преостанува евентуално да го победиме португалскиот шампион, што е и главната поента на турнирот. За нијанса сме послаби во однос на ланскиот состав, затоа што ни недостига малку убоитост од дистанца. Мојсоски и Миркуловски се добри играчи, но проблемот е во тоа, како да се даде гол од далечина. Значи, остана да ни недостига тој играч, кој ќе постигнува голови од далечина. Од останатото сум задоволен, сите играчи многу работеа и се залагаа на овие подготовки на Маврово и во Словенија - вели Червар.

- Порто е домаќин и со самото тоа има почетна предност. Останатите сме приближно еднакви. По малку уште ми претставува енигма Запорожје. Доволно е да се каже дека таму игра нивниот најдобар играч Бурка. Можеби е незгодно тоа што првиот дуел го играме токму против Динамо Минск, но тоа е сé така направено бидејќи Порто е домаќин, а домаќинот секогаш го игра последниот дуел. Потоа предност му давам на Динамо Минск, кој лани го гледав во Скопје, каде што играат одличните Украинци, Кошов и Онуфриенко, потоа Русинот Коваленко. Следиме ние, па Запорожје, иако секој може да изненади секого, но и да потфрли - објективен е Червар.

- Не се плашам од никого, ниту пак од атмосферата што би се создала во салата во Порто. Во секој случај, ова за нас ќе биде голем предизвик. Наша судбина е што ние секогаш мора повеќе да се потпираме на нашата одбрана, која е посилна страна од нападот, со кого не можеме никого целосно да го разбиеме, бидејќи немаме доволно муниција. Многу очекувам и од голманите, кои се солидни и очекувам да дадат максимум. Оптимист сум, како што секогаш и сум бил, но сепак и многу реален. Првпат одиме на гостување каде што не сме фаворити. Тоа е вистина, како што е вистина и тоа што нема да се предадеме против никого - коментира тренерот на Металург.