Металург Скопје ја доби одложената средба од 8-то коло во Скопско Супер женска лига против екипата на Ел Коритон од Кратово. Победата е очекувана бидејќи Ел Коритон е последнопласирана екипа во нашата најквалитетна лига. Меѓутоа, нашите девојки до победата дојдоа потешко од очекуваното. Делумно вината е кај гостинскиот тим кој достојно им се спротистави на девојките од Металург Скопје. Сепак, поголемиот дел од вината лежи во играта на Металург. Промашени се толку многу зицери, пропаднати толку контри што ако се реализираше секоја втора можност, ќе имавме двојно повисока разлика. Нашите девојки неправедно го потценија противникот и премногу комотно влегоа во натпреварот. Но, победа е победа, а грешките има кој да ги исправа.

Бевме во постојано водство и релативно рано го решивме победникот. Првото полувреме заврши со резултат 13:8. Во второто полувреме зголемивме на 8 гола разлика, при резултат 19:11. И тогаш за малку од готово вересија. Дозволивме Ел Коритон да направи серија од 4:0 и да се доближи на само 4 гола, 19:15. За среќа Металург се созеде и со своја контрасерија од 6:0 дојде до конечните 25:15. И повторно Симјановска најкорисна со своите 6 гола. Веднаш зад нејзе Гакидова со 5 постигнати гола.

РК Металург Скопје - Ел Коритон   25:15  (13:8)

РК Металург Скопје: Антиќ, Петковска, Јаневска, Трајковска 2, Гакидова 5, Ѓорѓиевска 3, Димитровска 1, Ливриниќ 3, Симјановска 6, Николиќ, Керамитчиева 3, Стојковска, Саздовска 2, Крстевска и Бебиќ.         Седмерци: 3/4.        Исклучувања: 12 минути.

РК Ел Коритон: Младеновска 1, Марковска 7, Атанасова, Станковиќ 2, Филиповска 1, Дрнева, Димитрова 3, Тодоровска, Миладиновска, Наковска, Радевска, Стојановска, Андова, Георгиевска.       Седмерци: 4/4.       Исклучувања: 14 минути.

Судии: Трајковски Мирко и Бајрам Денис од Скопје.

Делегат: Камишевски Душко од Скопје.