РК Металург, во рамките на второто коло од нокаут фазата во ЕХФ Купот, загуби во Брест од екипата на Брест Мешков со резултат 28:23 (14:12). Натпреварот помина во апсолутно изедначена игра. Пoведе Брест, прво со 3:0, па 6:2, Металург врати со 3 гола. Во 25 мин резултатот беше 12:12, па сепак полувремето заврши со предност на Брест 14:12. Второто полувреме помина во огорчена борба, а домакинот никако не успеваше да се одлепи. Во 34 минута резултатот гласеше 15:15, седум минути покасно сеуште имавме одлични 20:19. Брест дури на крајот успеа да стекне предност, 52 минута 24:19, 57 минута 26:23. На жалост, своја улога имаа и судиите кои за време на целиот натпревар, а особено во самата завршница, со неколку дискутабилни одлуки му овозможија предност на домакинот. Со тоа се потврдија стравувањата на Металург  пред натпреварот. Сепак, крајниот победник од овој двомеч ќе се знае по 7 дена. Секако дека Брест Мешков може да се победи во Скопје, а негативата од 5 гола е непријатна но не и безнадежна. Реваншот е закажан на 9 октомври во Скопје со почеток во 18.00 часот. Ќе се игра во салата “Автокоманда“. 

Брест Мешков: Черепенко, Крајнов – Колеснев (6), Пракапенја (6), Кириленко (4), Рубизов (2), Ревин, Башкин (4, сите од 7 метри), Григорјев, Баранов (1), Островски (1), Шумак (3), Филипов (1), Татарин. Исклучувања: 12 минути. Седмерци: 4/4.

Металург: Ангелов, Митревски – Алушевски, Н.Мојсовски (9), Миркуловски (4), Ракчевиќ (2), Милјак (2), Георгиевски (4), Марковски, Димовски (1), Чурувија (1), М.Стоилов, Ѓоргоновски. Исклучувања: 6 минути. Седмерци: 2/3.

Судии: Лаховичус Валдемарас и Гечевичус Валдас (Литванија). Делегат: Врублевски (Полска).